फेवाताल किनारमा ‘ट्रान्स पार्टी’, ८० जना पक्राउ

69

पोखरा। फेवाताल किनार लेकसाइडमा भएको ट्रान्सपार्टीमा प्रहरीले छापा मारेको छ । सो पार्टीमा छापा मार्दा नेपाली र विदेशीसहित करिब ८० जना पक्राउ परेका छन् । वडा प्रहरी कार्यालय बैदामका प्रहरी प्रमुख प्रमुख नायब उपरीक्षक (डीएसपी) कोमल शाहको कमान्डमा गएको टोलीले एकैपटक यति ठूलो संख्यामा उनीहरूलाई पक्राउ गरेको हो ।

ट्रान्सपार्टी विशेषगरी म्युजिक र लाइटसँग झुम्ने त्यस्तो पार्टी हो, जहाँ कसैलाई कसैको मतलव हुँदैन । पार्टीमा झुमेका व्यक्तिले गर्ने व्यवहार अस्वाभाविक पनि लाग्न सक्छ । ऊ आफ्नै संसारमा रमेको हुन्छ ।

पोखरा–६, लेकसाइडको खहरेमा रहेको द अफिस रेस्टुरेन्टमा ट्रान्स पार्टी भएको भन्ने सूचनाका आधारमा प्रहरीले छापा मारेको हो ।

सो रेस्टुरेन्टबाट गाँजा, चरेसलगायत लागूऔषधसहित उनीहरूलाई पक्राउ गरेको प्रहरीले जानकारी दिएको छ । उनीहरूलाई जिल्ला प्रहरी कार्यालय कास्कीमा राखिएको प्रहरी प्रवक्ता प्रमुख नायब उपरीक्षक (डीएसपी) रवीन्द्रमान गुरुङले जानकारी दिए ।

पक्राउ परेका सबैमाथि छानबिन गरी दोषीलाई कारबाही गर्ने र निर्दोषलाई छाड्ने प्रहरीले जनाएको छ । पोखरामा यसअघि पनि लुकिछिपी ट्रान्सपार्टी हुने गरेको थियो ।

Comments

comments