मिडिया काउन्सिलसम्बन्धी विद्येयक खारेज गर्नुपर्छ : शाही युवा शक्ति नेपाल

4

काठमाडौं, ३ जेठ । शाही युवा शक्ति, नेपालले प्रेस स्वतन्त्रतालाई कुण्ठित गर्नेगरि सरकारले मिडिया काउन्सिलसम्बन्धी विद्येयक ल्याउन लागेको भन्दै तत्काल उक्त विद्येयक खारेजीको माग गरेको छ ।

शुक्रबार रिपोर्टर्स क्लब नेपालमा पत्रकार सम्मेलन गर्दै शाही युवा शक्ति, नेपालले यस्तो माग गरेको हो । लोकतन्त्रको आवरणमा वर्तमान प्रधानमन्त्री केपी शर्मा ओली नेतृत्वको सरकारले मिडियालाई नै नियन्त्रण गर्नेगरि विद्येयक ल्याउन लागेको अध्यक्ष पशुपति खड्काले आरोप लगाए ।

यो पनि पढ्नुहोस्
अपहरण शैलीमा घरबाटै कार्यकर्ता पक्राउ गरेको भन्दै शाही युवा शक्ति, नेपालको आपत्ति, २४ घण्टाभित्र रिहाई गर्न अध्यक्ष खड्काको अल्टिमेटम
शाही युवा शक्तिले ढलेको त्रिभुवनको शालिक किन उठायो ?

खड्काले भने,‘निरंकुश ओली सरकारविरुद्ध सम्पूर्ण नेपाली जनतालाई हामी सडकमा उत्रिनको लागि यही मञ्चबाट आग्रह गर्दछौं । अहिले आन्दोलन नगरे मुलुक झन एकपछि अर्को गरि ठूलो अप्ठ्यारो र भूमरीमा फस्छ ।’उनले अहिलेपनि जनताको चाहना भनेको मुलुकमा राजसंस्था पूर्नस्थापना होस भन्ने नै भएको सुनाए ।

खड्काले थपे,‘विदेशीको ईशारामा लादिएको यो गणतान्त्रिक व्यवस्था देश र जनताको लागि धेरै महँगो सावित भैसक्यो । अब देशले यो व्यवस्था धान्न सक्दैन् । त्यसैले राजसंस्था चाहिन्छ । राजा भनेको मुलुकको अभिभावक हो । अहिले मुलुक र हामी नेपाली जनता राजा नहुँदा टुहुरो भएका छौं ।’

उनले लोकतान्त्रिक मूल्य र मान्यतामा आधारित रहेर आफ्ना संगठनका सदस्यहरुले गतिविधि गर्दापनि ओली सरकारले निरंकुशता लादेर अपहरण शैलीमा गिरफ्तार गरेकोमा गम्भिर आपत्ति जनाए ।

उनले भने,‘श्रीमान गम्भिर गीत बजाउँदा गणतान्त्रिक सरकार थर्कमान भएर मुकदर्शक भयो । र, हाम्रो संगठनका पश्चिमाञ्चल प्रमुख प्रित्तम केसी र रुपन्देही जिल्ला अध्यक्ष महेन्द्र विश्वकर्मालाई जबरजस्ती अपहरण शैलीमा पक्राउ गरि मुद्दा चलाईएको छ । यो सरकारको कायरता हो । हामी हाम्रो आन्दोलनका कार्यक्रमहरुलाई झनै सशक्त बनाउँछौं । यो विदेशीको ईशारामा चल्ने सरकारसँग एक ईन्चपनि डराउँदैनौं ।’

खड्काले सम्पूर्ण नेपाली जनताले अब आफ्नो मोवाईलको ‘रिङ–टोन’ मा श्रीमान गम्भिर नेपाली राष्ट्रिय गान राख्नुपर्ने र हरेक चोकमा यो धुन गुञ्जाउनुपर्ने बेला आएकोले सोहीअनुसारको अपिलसमेत गरे ।

कार्यक्रममा संगठनका महासचिव कृष्णराज थापाले सरकारले आफ्ना नेता तथा कार्यकर्ताहरुलाई निःशर्त रिहाई गर्नुपर्ने माग गरे । त्यस्तै, सरकारले विद्येयकमार्फत प्रेसमाथि लगाउन खोजेको अंकुशको पनि उनले विरोध गरे । उनले भने,‘सरकारले ल्याउन लागेको मिडिया काउन्सिलसम्बन्धी विद्येयक प्रेसमैत्री हुनुपर्छ । हामी प्रेस स्वतन्त्रताको पक्षमा छौं ।’

Comments

comments