US Khabar

साहित्यकार राजबाबु श्रेष्ठ ‘सागर’को कविता संग्रह ‘हराएका छोराहरू’ बिमोचन

- Admin | २ वर्ष पहिले प्रकाशित

साहित्यकार राजबाबु श्रेष्ठ ‘सागर’को कविता संग्रह ‘हराएका छोराहरू’ बिमोचन

 

 

माधव घिमिरे ‘अटल’

 

कान्छो छोरो पनि देश बदल्छु भन्थ्यो
देश बदल्ने कलिला सपनाहरू थुन्सेमा बोकी
छिर्यो जङ्गल जनयुद्धका लागि
ऊ पनि ढल्यो, त्यहीँ गल्यो
ककसले कता फाले
ऊ जनयोद्धाबाट सहिदमा बदलियो ।

प्रतिक्रान्तिको लप्काले क्वाप्लाक्कै निलेको जनयुद्धबारे आफ्नो असन्तुष्टि जाहेर गरेका छन् बहुविधामा कलम चलाइरहेका शालीन साहित्यकार राजबाबु श्रेष्ठ ‘सागर’ले आफ्नो कविता कृति ‘हराएका छोराहरू’मार्फत् । ‘बन्द फ्रेमभित्रको चिठ्ठी’का उपन्यासकार तथा अभिनेता सागरको ‘हराएका छोराहरू’ कविता सङ्ग्रह तथा ‘देशको चिना’ मुक्तक सङ्ग्रह गत शुक्रबार नेपाल प्रज्ञा प्रतिष्ठानका कुलपति गङ्गाप्रसाद उप्रेतीको कार्यकक्षमा लोकार्पण गरियो ।

चौध वर्षकै उमेरमा ‘प्रेम फैसला’ नाटकको पाँच भागसम्म लेखन, अभिनय र निर्देशन गरेका सागरका कविता तथा मुक्तकबारे सङ्क्षिप्त टिप्पणी गर्दै उप्रेतीले आख्यानबाट कवितामा फड्को मारेका सागरका कृतिहरू सरल, सङ्क्षिप्त र ओजपूर्ण भएको दावी गरे । पुष्प पराग साहित्य प्रतिष्ठानका अध्यक्ष यज्ञेश्वर निरौलाको अध्यक्षतामा सम्पन्न भएको सो कार्यक्रमका सहभागीहरुलाई कवि सागरकै कविता वाचन गरी सचिव डा• प्रदीपकुमार मैनालीले स्वागत गरेका थिए ।

उपन्यासकार तथा कवि टीएन भट्ट ‘विश्वामित्र’ले सहजीकरण गरेको सो कार्यक्रममा नेपाल प्रज्ञा प्रतिष्ठानका सदस्य सचिव प्रा•जगतप्रसाद उपाध्यायले सागरका सिर्जना सटीक तथा समसामयिक भएको जिकिर गरे । विमोचन कार्यक्रममा नेपाल प्रज्ञा प्रतिष्ठानका काव्य विभाग प्रमुख प्रा•डा• हेमनाथ पौडेल, प्राज्ञ शशी लुमुम्बु, स्रष्टा राधा दुलाल कार्की, विश्वास घिमिरे, रविन्द्र तिम्सिना लगायत झन्डै एक दर्जन व्यक्तित्वहरूको सहभागिता रहेको थियो ।

वर्तमान समाजका बेथिति र विद्रुपीकरणका विरूद्ध तीखो लेखनीमार्फत् धावा बोलेका सागरका कृतिहरूको लोकार्पण कार्यक्रममा उनले रेगिस्तानमा रगत – पसिना बगाउँदाको हृदयविदारक अनुभूति पनि सुनाएका थिए । उनका ‘मुनारमा’ र ‘घिमिरेबाको कथा’ उपन्यास प्रकाशोन्मुख छन् ।

प्रतिक्रिया

" data-width="100%" data-numposts="5">
error: Content is protected !!